ده‌ستگیرکردن و ئازادکردنی ساڵح موسلیم

  English    -   Deutsch  -  kurdi   -    كوردی   -   فارسی                                                        

ده‌ستگیرکردن و ئازادکردنی ساڵح موسلیم پ‌د‌ف چاپکردن پۆستی ئەلیکترۆنی

نه‌ورۆز مه‌حمود

ئازادکردنی سه‌رکرده‌ ساڵح موسلیم زله‌یه‌کی ئاشکرابوو له‌ فه‌خری فاشیزمی تورکی ، ئه‌گه‌ر تورکه‌کان هه‌موو دۆڕاندنێکیشیان ناونابێ سه‌رکه‌وتن ، ئازادکردنی ئه‌و ئه‌مجاره‌یان شکسته‌ و ناتوانن بیشارنه‌وه

یه‌که‌م: ئه‌ردۆگان زۆر به‌ حه‌ماسه‌وه‌ به‌شوێنیه‌وه‌ بوو ، ته‌نانه‌ت زیاتر له‌ هه‌ر هاوڵاتیه‌کی تر که‌ خه‌ڵکی ده‌ره‌وه‌ی تورکیایه‌ ، بێگومان هۆکاره‌که‌ی بۆ ئه‌وه‌ ده‌گه‌ڕێته‌وه‌ ، که‌ ساڵح موسلیم ڕوو به‌ ڕوو ئه‌ردۆگانی بینیوه‌ و به‌ده‌ر له‌ ئه‌ندامان و هاوسه‌رۆکانی هاده‌په‌ تاکه‌ کوردی ده‌ره‌وه‌ی تورکیایه‌ که‌ سنوری بۆ داناو له‌ ماڵه‌که‌ی خۆیدا شکاندی ، بێگومان کاتێ که‌ بانگێشت کرابوو بۆ ئه‌وه‌ی وه‌ک خێڵی ئه‌نه‌که‌سه‌ خۆی بفرۆشێ ، وه‌ها توند ڕه‌تی کرده‌وه‌ که‌ ئه‌ردۆان اش سه‌رکه‌وتنی کۆبانێ به‌ هۆشی خۆیدا هاته‌وه‌ و زانی که‌ کێی بینیوه‌

بۆیه‌ ڕقی ئه‌ردۆگان به‌رامبه‌ر به‌و ڕقێکی که‌سییه‌ و هه‌وڵدان بۆ جێبه‌جێ کردنی فرمانێکی وه‌هاش ، ئه‌گه‌ر چی ده‌ڵاڵه‌ ئه‌ڵمانیه‌کانی حیزبه‌که‌ی ئه‌نجیلا مێرکل زۆر هه‌وڵیان بۆ دا ، ته‌نها داڕمانی که‌سایه‌تی ئه‌ردۆگان ده‌گه‌یه‌نێ ، به‌ڵام ئه‌مڕۆ مێرکل له‌ سازشکردنی ناوخۆییدایه‌ و هه‌موو پۆسته‌ وزاریه‌کانی خستۆته‌ به‌رده‌ستی پارته‌ ڕکابه‌ره‌که‌ی بۆ ئه‌وه‌ی حکومه‌ت ته‌شکیل بکرێ و نایپه‌رژێته‌ سه‌ر لایه‌ لایه‌ بۆ ئه‌و به‌چکه‌ دیکتاتۆره‌ی ئه‌ناتۆڵیا ، له‌ پاش ئه‌م شکسته‌ ، یان ده‌بێ ئه‌ردۆگان مل بدات بۆ بڕیاره‌ نێو ده‌وڵه‌تیه‌کان و دان به‌ مافی کورددا بنێ لانی که‌م و له‌ یه‌که‌م هه‌نگاودا له‌ سوریا ، یان ده‌بێت به‌ جانه‌وه‌رێکی سه‌ددام ئاسا .. که‌ ماخۆلانه‌که‌ی هه‌تا فه‌نابوونی خۆی نایوه‌ستێنێته‌وه‌

دووه‌م: کورد له‌مێژوودا هه‌میشه‌ یان سازشی کردووه‌ یان توشی شکستی سیاسی بووه‌ ، به‌ڵام ئه‌مجاره‌یان نه‌ سازشی کرد و نه‌ شکستیشی هێنا ، بێگوومان چه‌نده‌ ئازادکردنی ئه‌و سه‌رکه‌وتنی سیاسیش بگه‌یه‌نێ ، ده‌ستگیرکردنه‌که‌ی له‌ بناغه‌وه‌ مافیایی و قه‌وته‌یی حکومه‌ته‌ مافیاییه‌کانی ئه‌وروپا پیشان ده‌دات ، که‌ پاڵه‌وانه‌کانیان بازرگانه‌کانن و لۆبییست به‌ شۆڕشگێڕ ناوده‌به‌ن ، ئه‌وان ته‌متومانێکن که‌ خۆی ناوناوه‌ دیموکراسیه‌ت و هه‌رده‌م ئاماده‌ن ده‌ستبه‌رداری هه‌موو بنه‌مایه‌کی ئه‌خلاقی بن و بۆندی بازرگانی مۆر بکه‌ن ، چوونی ژماره‌یه‌کی زۆر له‌ کوردانی تاراوگه‌ و بێگوومان کوردی هه‌ر چوار پارچه‌ له‌گه‌ڵ هاوپه‌یمانه‌ چه‌په‌ ئه‌وروپیه‌کان و تێکۆشانێکی بێ وچان ساڵح موسلیمیان ئازاد کرد ، نه‌ک عه‌داله‌ت و مافی مرۆڤ! که‌ ئه‌گه‌ر هه‌مان پشتیوانی سه‌رده‌مانی زوو ببوایه‌ ، نه‌ سه‌رکرده‌ی وه‌ک شه‌ره‌ف که‌ندی و د.قاسملۆ و تیرۆر ده‌کران و نه‌ سه‌رکرده‌ عه‌بدوڵا ئۆجالانیش ده‌ستگیرده‌کرا ، بێگومان ئه‌و یه‌کگرتووییه‌ش به‌رهه‌می به‌رخۆدانه‌کانی کۆبانی و عه‌فرینن ، ڕه‌نگه‌ ئێستا ڕونتر ببێته‌وه‌ .. ئایا بۆ ئه‌ردۆگان ئاماده‌یه‌ ده‌ست له‌ پانتۆڵه‌که‌ی خۆشی به‌ربدات ، ته‌نها له‌پێناوی شکست پێهێنانی ڕۆژاوا؟

سێیه‌م:ڕۆڵی ئه‌وروپیه‌کان قه‌ت شه‌ریفانه‌ نه‌بووو و نابێ ، ئه‌وان نه‌ له‌ دژی کورد هاوکاری تورکیا ده‌که‌ن و نه‌ له‌ خۆشه‌ویستی کوردیش جار جاره‌ کاردانه‌وه‌یان به‌رامبه‌ر به‌ تورکیا هه‌یه‌ ، ئه‌وان ، ئێستاشی له‌سه‌ر بێ خۆیان به‌ کۆلۆنیاڵ ده‌زانن و هه‌ر مرۆڤێکی نا ئه‌وروپیش به‌ ژماره‌ی ئه‌کاونته‌ بانکیه‌که‌ی پێوانه‌ ده‌که‌ن ، بۆ ئه‌وان تورکیا گرنگه‌ و هه‌ر به‌ گرنگیش ده‌مێنێته‌وه‌ ، چونکه‌ له‌ پاش ئه‌وه‌ی له‌ سه‌ده‌ی پێشوودا یه‌کتریان خه‌ڵتانی خوێن کرد ، له‌وه‌ حاڵی بوون که‌ ئیتر خۆره‌که‌یان به‌ره‌و ئوابوون ده‌چێ و هاتن جیهانیان پڕ کرد له‌ ڕژێمی عه‌سکه‌رتاری و دیکتاتۆر که‌ تورکیا دواهه‌مینیانه‌ و گه‌لانی جیهان به‌ سوپاکانی ئه‌وان داده‌پڵۆسن ، زۆرینه‌ی مرۆڤه‌ سپی پێسته‌کان هه‌ر ڕه‌نگه‌ مرۆڤێکی تر له‌ جیهاندا به‌ مرۆڤی پله‌ نزم داده‌نێن و هه‌موو تاقیکردنه‌وه‌یه‌کیان له‌سه‌ر ده‌که‌ن

به‌ڵام ئه‌مڕۆ ئه‌وروپا یه‌کپارچه‌ قه‌یرانی کۆمه‌ڵایه‌تی و ئابورییه‌ ، هیوادارم کوردانی تاراوگه‌ ده‌ستبکه‌ن به‌ وێنه‌گرتن و پیشاندانی سواڵکردن له‌ سه‌ر شه‌قام و بێلانه‌کان و بێکاری و خۆپیشاندانی سه‌ندیکا کرێکاری و دژه‌ کاپیتالیزمییه‌کان ، که‌ نه‌ک یه‌کپارچه‌ خۆرهه‌ڵات و باشوری ئه‌وروپای گرتۆته‌وه‌ و به‌ره‌و ته‌قینه‌وه‌ ده‌چێ ، به‌ڵکو ئه‌مڕۆ له‌ وڵاتانی ئابوور به‌هێزی وه‌ک ئه‌ڵمانیا و فه‌ره‌نسا و سویسرا و نه‌مساشدا یه‌کجار زۆر بووه‌ ، ئه‌وروپا هه‌ر بریتی نیه‌ له‌ کۆشکی سه‌ندرێلا و باخچه‌ی دڵداران ، به‌ڵکو یه‌ک کیشوه‌ره‌ له‌ پۆلێنکردنی مرۆڤه‌کان ، کوتومت وه‌ک بنه‌ماڵه‌ی که‌سایه‌تییه‌ سیاسیه‌کانی هه‌رێم و کوڕه‌ به‌رپرسه‌کان به‌رابه‌ر ئه‌و گه‌نجانه‌ی که‌ له‌ خۆپیشانداندا دوسه‌د و په‌نجا دینار پیشان ده‌ده‌ن ، و ده‌ڵێن خاوه‌نی ئه‌وه‌نده‌ن ، بێگومان ئه‌وانه‌ی لای ئێمه‌ش له‌ ئه‌وروپییه‌کانه‌وه‌ فێربوون

ئه‌ڵمانیا و به‌ تایبه‌تی حکومه‌ته‌که‌ی ئه‌نجیلا مێرکل و هه‌موو هاوپه‌یمانه‌کانیشیان له‌ سه‌رتاپای ئه‌وروپادا ، که‌ بێگومان هه‌ر بازرگانه‌کانن ، ناتوانن چیدی ئه‌ردۆگان بپارێزن و پشتیوانی لێبکه‌ن ، هه‌رچه‌نده‌ ئه‌ڵمانیا هه‌تا دوا هه‌ناسه‌ هه‌وڵی بۆ دان ، به‌ڵام بۆیان نه‌چووه‌ سه‌ر ، له‌لایه‌ک ده‌زانن له‌ناوچوونی ئه‌ردۆگان واته‌ له‌ناوچوونی تورکیا و زه‌ره‌رێکی گه‌وره‌ له‌ که‌رتی بازرگانی تورکی - ئه‌ڵمانی ، به‌ڵام له‌هه‌مانکاتیشدا که‌س ناخوازێ تیمساحێک بخاته‌ حه‌وشه‌که‌ی خۆی

بێگومان ئه‌وروپیه‌کان ئه‌مڕۆ ده‌زانن ، که‌ ڕاوه‌دوونان و ده‌ستگیرکردنی سه‌رکرده‌ی مێژوویی عه‌بدوڵا ئۆجالان گه‌وره‌ترین هه‌ڵه‌بوو که‌ ئه‌مڕۆ قوڕده‌خۆن و نازانن چۆنچۆنی ڕێکی بخه‌نه‌وه‌ ، چونکه‌ به‌وه‌ نه‌ته‌وه‌یه‌کی زیاتر له‌ چل ملیۆنییان نه‌ک به‌هێز کرد و پاڵیان پێوه‌ نان بۆ شۆڕش ، به‌ڵکو له‌هه‌مان کاتیشدا ملیۆنان مرۆڤیشیان له‌ خۆرهه‌ڵاتی ناوین هه‌ر له‌به‌لاش کرد به‌ نه‌یاری خۆیان ، له‌لایه‌کی تریش ئه‌مڕۆ ئه‌وان تاکه‌ وه‌به‌رهێنی دونیا نین و که‌رتی پیشه‌سازی ڕکابه‌ر له‌ ده‌وڵه‌تانی نا ئه‌وروپیش زۆره‌ ، که‌ له‌ داهاتوودا قه‌ره‌بووی توڕه‌یی کورد بکه‌نه‌وه‌ به‌رابه‌ر یه‌کێتی ئه‌وروپا ، بۆیه‌ هه‌رچه‌ند دوژمنی ته‌وقه‌ سه‌ری ئه‌ردۆگانیش بن ، به‌ڵام هه‌میشه‌ و لێره‌ و له‌وێ پاشه‌ڵیشی بۆ ده‌لێسنه‌وه‌ و فشار ده‌خه‌نه‌ سه‌ر کورده‌کان ، چونکه‌ ده‌زانن هه‌رچه‌نده‌ ئه‌ردۆگان دۆستیش نه‌بێ ، کورد پاش ده‌ستگیرکردنی به‌ڕێز عه‌بدوڵا ئۆجالان و به‌ بناغه‌دانانی کاره‌کته‌ری مرۆڤی کورد له‌پاش کۆبانێ و عه‌فرین ئه‌مڕۆ هه‌رگیز جارێکی تر نابنه‌وه‌ به‌ کۆیله‌ی کاپیتالیزمی ئه‌وروپی هاوپه‌یمانی تورک ، بۆیه‌ چه‌نده‌ ئازادبوونی ساڵح موسلیم دڵخۆشکه‌ر بێ ، پێویسته‌ بوترێ ، بڕیاری ده‌ستگیرکردنیشی سه‌رتاپا بێ ئه‌خلاقی بووه‌ و خودی ئه‌و دادوه‌ره‌ی که‌ بڕیاری ئازادکردنی بۆ ده‌رکردووه‌ زۆر باش له‌وه‌ حاڵییه‌ . که‌ ئه‌و ڕه‌نگه‌ له‌و ئه‌وروپییه‌ لیبه‌راڵانه‌ بێ ، که‌ هیوای به‌ ئاشتکردنه‌وه‌ی کورده‌کان هه‌یه‌ و نایه‌وێ توڕه‌تریان بکات، که‌ له‌ ئه‌وروپادا زیاتر له‌ سێ ملیۆنن