شەهید کۆچەر (مامۆستا ناسیح) سی ساڵ لەمەوبەر شەهید بوو

  English    -   Deutsch  -  kurdi   -    كوردی   -   فارسی                                                        

شەهید کۆچەر (مامۆستا ناسیح) سی ساڵ لەمەوبەر شەهید بوو پ‌د‌ف چاپکردن پۆستی ئەلیکترۆنی

وێنە وەرگیراوە

شەهید " ناسیح حەمەدەمین " ناسراو بە " کۆچەر " ناوێکی پرشنگداری خەباتی چینایەتی و سونبولی بەرەنگاربوونەوەی ڕژێمی بەعسی بوو .

ئەو تێکۆشەرەی بڕیاریدابوو هەر لەسەرەتاوە لە پێناو ڕووخانی ڕژێمی دیکتاتۆری سەدام حسێن ، تا دوا تنوکی خوێنی شەڕ بکات و تەسلیمیەت قەبوڵ نەکات ، کۆچەر توانی بۆ بەعس و سیستەمە دیکتاتۆریەکەی بسەلمێنێ کە کوردێکی کۆمۆنیست دەتوانێ بەرەنگاری سوپایەکی دیکتاتۆر ببێتەوە و شکست بە ئیڕادەی داگیرکەر بهێنێ .

لە شەوی ١٧ لەسەر ١٨ ی مانگی (ئایار – مای ) ساڵی ١٩٨٥ دا لە گەڕەکێکی شاری هەولێر ، دوای ئەوەی هێزێکی زۆری دەزگا داپڵۆسێنەرەکانی ڕژێمی بەعسی بەخۆیان هەموو جۆرە چەکەکانیان و بەیاوەری خیانەتکارێکی کورد و دەیان جاش و خۆفرۆش دەورەی ماڵیک دەدەن کە (کۆچەر) لەوکاتەدا لەوێبوو ، بەمەبەستی گرتنی پەلاماریدەدەن ، بەڵام کۆچەر بەخۆی دەمانچەکەی دەستی بەرەنگارییان دەبێتەوە و دوای چەندین کاتژمێر ژمارەیەک بەعسی و خۆفرۆش دەکوژێ و تەسلیم نابێ .

ڕژێمی بەعسی دووچاری شڵەژان دەبێ و وادەزانێ ژمارەیەکی زۆر پێشمەرگەی پارتی کۆمۆنیستی عیڕاق لەو ماڵەن و شەڕ دەکەن ، بۆیە فڕۆکەی جۆری هەلیکۆپتەر لەوکاتەدا لەسەر ئاسمانی ئەو گەڕەکە دەسوڕێتەوە ، کۆچەر تا شەو بەردەوام دەبێ لەبەرەنگاربوونەوەی ڕژێم ، لە کۆتاییدا (یەک فیشەک) ی دەمێنێ و کاتژمێرەکانی بەرەبەیانی ئەو ڕۆژە بە مۆڕاڵێکی هەرە بەرزەوە نامەیەک بۆ براکەی دەنووسێ و لەکۆتایی نامەکە دەنووسێ کاتژمێر 3:19 شەوە لە 3:21 خولەک ئاخیر فیشەک بۆ خۆمە و ئیتر دووبارە چاوەکانت ماچ دەکەم

کۆچەر

١٧لەسەر ١٩٨٥/٥/١٨

دەقی نامەکەی شەهید کۆچەر کە چەند خولەکێک بەر لە شەهیدبوونی نووسیبووی / بۆ خوێندنەوەی تەواوی نامەکە کلیک لەسەر نامەکە بکە

شەهید کۆچەر دوای نووسینی نامەکە بەدەستی خۆی ڕێگای سەرفرازی هەڵبژارد و خۆی بەدوایین فیشەکی دەمانچەکەی شەهید کرد ! هێزەکانی ڕژێم تا چەندین کاتژمێر دواتریش نەوێران دەرگا بکەنەوە پاش چاوەڕوانیەکی زۆر بەترس و لەزرەوە بۆیان دەرکەوت کە " کۆچەر " شەهید بووە و کۆتایی بەژیانی خۆی هێناوە و تەسلیمەیەتی قەبوڵ نەکرد .

باوەڕمەندانی خەباتی چینایەتی و نەتەوایەتی مافی خۆیانە شانازی بەو تێکۆشەرە کۆمۆنیستە کوردەی شاری هەولێر بکەن ، هەولێری لانەی خەباتی چینایەتی و قوتابخانەی داهێنانی مارکسیەت لە عیڕاق و کوردستان ، ئەو شارەی بەدەیان سەرکردەی کۆمۆنیستی پێگەیاند و چەندین دەیە سەرکردایەتی بزوتنەوەی کۆمۆنیستی لە عیڕاق و کوردستان کرد و لەو ڕێگایەشدا قوربانی زۆریداوە ، مافی خۆیەتی هەموو ڕۆژەکانی ساڵ یادت بکات .

هەزاران سڵاو لە گیانی پاکی شەهید " کۆچەر" و سەرجەم شەهیدانی خەباتی چینایەتی و نەتەوایەتی .

FPPK

17.05.2015